ਬੇਸਬਰੀ (ਵਿਅੰਗ )

ਸਾਧੂ ਰਾਮ ਲੰਗਿਆਣਾ (ਡਾ.)   

Email: dr.srlangiana@gmail.com
Address: ਪਿੰਡ ਲੰਗੇਆਣਾ
ਮੋਗਾ India
ਸਾਧੂ ਰਾਮ ਲੰਗਿਆਣਾ (ਡਾ.) ਦੀਆਂ ਹੋਰ ਰਚਨਾਵਾਂ ਪੜ੍ਹਨ ਲਈ ਇਥੇ ਕਲਿਕ ਕਰੋ


ਠੇਕਾ ਗਰੰਟੀ ਬੇਸਬਰੀ ਰੁਜ਼ਗਾਰ ਯੋਜਨਾ
ਖੁਸ਼ਖ਼ਬਰੀ………………ਖੁਸ਼ਖ਼ਬਰੀ……………………ਖੁਸ਼ਖ਼ਬਰੀ……………………………………
  ਬਿਨਾਂ ਸਿਫਾਰਸ਼, ਬਗੈਰ ਰਿਸ਼ਵਤ ਸਿੱਧਾ ਸੰਪਰਕ 
   ਇੱਕ ਸਾਲ ਦੀ ਭਰਤੀ ਲਈ ਪਧਾਰੋ
           ਅਖਬਾਰਾਂ ਵਿੱਚ ਇਸ ਬਹੁਤ ਵੱਡੇ ਪ੍ਰਕਾਸ਼ਿਤ ਇਸ਼ਤਿਹਾਰ ਨੂੰ ਪੜ੍ਹਕੇ ਦਿੱਤੇ ਉਸ ਸਥਾਨ ਉਪਰ ਡਿਗਰੀ/ਡਿਪਲੋਮਾ ਹੋਲਡਰ ਅਤੇ ਹੋਰ ਬਹੁਤ ਸਾਰੇ ਵੱਖ-ਵੱਖ ਕੋਰਸਾਂ ਅਧਾਰਿਤ ਪੜ੍ਹੇ-ਲਿਖੇ ਬੇਰੁਜ਼ਗਾਰ ਮੁੰਡੇ/ਕੁੜੀਆਂ ਦਾ ਤਾਂਤਾ ਲੱਗਾ ਹੋਇਆ ਸੀ। ਲਓ ਜੀ, ਮੈਨੂੰ ਭਰਤੀ ਕਰਕੇ ਰੁਜ਼ਗਾਰ ਦੇਵੋ। ਮੈਂ ਬੀ.ਏ.,ਬੀ.ਐੱਡ… ਲਓ ਜੀ, ਮੈਨੂੰ ਰੁਜ਼ਗਾਰ ਦੇਵੋ। ਮੈਂ ਡਬਲ ਐੱਮ.ਏ.,ਬੀ.ਐੱਡ… ਸਾਨੂੰ  ਜੀ ਧਿਆਨ ਚ ਰੱਖੋ। ਅਸੀਂ ਜੀ.ਐੱਨ.ਐੱਮ. ਨਰਸਿੰਗ, ਬੀ.ਐੱਸ ਸੀ., ਐੱਲ.ਐੱਲ.ਬੀ… ਆਦਿ ਇੱਕ ਦੂਜੇ ਤੋਂ ਮੂਹਰੇ ਹੋ-ਹੋ  ਕੇ ਮੁੰਡੇ/ਕੁੜੀਆਂ ਹੋਕੇ ਤੇ ਹੋਕਾ ਦੇ ਰਹੇ ਸਨ।
                   ਰੁਕੋ, ਸੁਣੋ… ਜ਼ਰਾ ਧਿਆਨ ਨਾਲ ਕਿ ਸਾਡੇ ਮੂਹਰੇ ਤੁਹਾਡੀ ਪੜ੍ਹਾਈ ਕੋਈ ਮਹਿਣਾ ਨਹੀਂ ਰੱਖਦੀ। ਅਸੀਂ ਪੜ੍ਹਿਆਂ-ਲਿਖਿਆਂ ਤੋਂ ਇਲਾਵਾ ਅਨਪੜ੍ਹਾਂ ਨੂੰ ਵੀ ਧਿਆਨ ਹਿੱਤ ਰੱਖਿਆ ਹੋਇਆ ਹੈ ਨਾਲੇ ਅਜੇ ਤੁਸੀਂ ਪੜੇ-ਲਿਖੇ ਨੌਜਵਾਨ ਘੱਟ ਗਿਣਤੀ ਵਿੱਚ ਪਹੁੰਚੇ ਹੋ। ਸਾਨੂੰ ਬਹੁਤ ਜ਼ਿਆਦਾ ਬੇਰੁਜ਼ਗਾਰਾਂ ਦੀ ਲੋੜ ਹੈ ਜ਼ਰਾ ਸਵਰ ਕਰੋ… ਸਵਰ… ।ਇਹ ਠੇਕਾ ਗਰੰਟੀ ਬੇਸਬਰੀ  ਰੁਜ਼ਗਾਰ ਯੋਜਨਾ ਹੈ, ਜਾਓ… ਅਜੇ ਜ਼ਰਾ ਔਹ ਸਾਹਮਣੇ ਗਰਾਊਂਡ ਵਿੱਚ ਜਾ ਕੇ ਕੁਝ ਸਮਾਂ ਹੋਰ ਇੰਤਜ਼ਾਰ ਕਰੋ। 
        ਇੰਟਰਵਿਊ ਸਥਾਨ ਦੀ ਉਪਰਲੀ ਮੰਜ਼ਿਲ ਤੋਂ ਆਈ ਆਵਾਜ਼ ਨੂੰ ਕਬੂਲਦਿਆਂ ਸਾਰੇ ਜਾਣੇ ਗਰਾਊਂਡ ਵਿੱਚ ਬੈਠੇ ਇੱਕ ਦੂਜੇ ਨਾਲ ਹੈਰਾਨੀਜਨਕ ਵਿਚਾਰਾਂ ਪ੍ਰਗਟਾ ਰਹੇ ਸਨ ਕਿ ਵੇਖੋ ਯਾਰ… ਨਾਂ ਰਿਸ਼ਵਤ, ਨਾਂ ਸ਼ਿਫਾਰਸ਼ ਤੇ ਰੁਜ਼ਗਾਰ ਗਰੰਟੀ ਪੱਕਾ ਇੱਕ ਸਾਲ…
         ਥੋੜੇ ਸਮੇਂ ਬਾਅਦ ਇੰਟਰਵਿਊ ਲਈ ਲੱਗੀ ਆਵਾਜ਼ ਦੌਰਾਨ ਸਭ ਮੁੰਡੇ/ਕੁੜੀਆਂ ਆਪੋ-ਆਪਣੀਆਂ ਕਤਾਰਾਂ ਵਿੱਚ ਇੰਟਰਵਿਊ ਦੇ ਕੇ ਅੱਗੇ ਜਾ ਕੇ ਉਸ ਸਥਾਨ ਦੇ ਅੰਦਰਲੇ ਪਾਸੇ  ਲਿਖੇ ਨਿਯਮ ਬੋਰਡ ਪੂਰੇ ਧਿਆਨ ਨਾਲ ਪੜ੍ਹ ਰਹੇ ਸਨ, ਜਿਸ ਉਪਰ ਹੇਠ ਲਿਖੇ ਅਨੁਸਾਰ ਵੇਰਵੇ ਦਿੱਤੇ ਗਏ ਸਨ।
ਨੰਬਰ 1. ਘਰੋਂ ਤੁਰਨ ਤੋਂ ਲੈ ਕੇ ਹਰ ਪਿੰਡ/ਕਸਬੇ/ਸ਼ਹਿਰ-ਬਜ਼ਾਰਾਂ ਦੇ ਪਹਿਲੇ, ਅੰਦਰਲੇ, ਅਖੀਰਲੇ ਮੋੜਾਂ ਉਪਰ ਬੇਰੁਜ਼ਗਾਰ ਟਿਕਾਣਿਆਂ ਦੀ ਮੁੱਖ ਸਹੂਲਤ ਹੈ।
2. ਦੁਨੀਆ ਭਰ ਵਿੱਚ ਅਨਪੜ੍ਹਾਂ ਦੇ ਪੜਨ ਲਈ ਉਨੇ ਸਕੂਲ ਨਹੀਂ ਹਨ ਜਿੰਨੀ ਇਨ੍ਹਾਂ ਟਿਕਾਣਿਆਂ ਦੀ ਗਿਣਤੀ ਹੈ।
3. ਇਸ ਭਰਤੀ ਵਿੱਚ ਬੇਰੁਜ਼ਗਾਰਾਂ ਲਈ ਸਖਤ ਹਦਾਇਤ ਦੇ ਨਾਲ-ਨਾਲ ਮੁੱਖ ਸਹੂਲਤ ਇਹ ਵੀ ਹਨ ਕਿ ਸਾਲ ਵਿੱਚ ਨਾਂ ਕੋਈ ਐਤਵਾਰ, ਨਾਂ ਕੋਈ ਸਰਕਾਰੀ/ਪ੍ਰਾਈਵੇਟ ਛੁੱਟੀ ਹੋਵੇਗੀ ਸਗੋਂ 365 ਦਿਨਾਂ ਦਾ ਸਦਾ ਵਰਤ ਹੋਵੇਗਾ। 
4. ਭਾਵੇਂ ਸਾਡੇ ਵੱਲੋਂ ਪ੍ਰਦਾਨ ਕੀਤੇ ਜਾ ਰਹੇ ਸੋਮਰਸ ਦੀ ਵਰਤੋਂ ਨਾਲ ਮਨ ਵਿੱਚ ਬਹੁਤ ਵਕਾਰ ਪੈਦਾ ਹੁੰਦੇ ਹਨ ਪ੍ਰੰਤੂ ਮੀਚੀਆਂ ਹੋਈਆਂ ਅੱਖਾਂ ਵਾਲੇ ਸਾਡੇ ਸਮਾਜ ਦਾ ਸਾਡੇ ਮੂਹਰੇ ਇਖਲਾਕ ਚੁੱਪ ਹੈ…ਧਰਮ ਚੁੱਪ ਹੈ ਅਤੇ ਹੋਰ ਬਹੁਤ ਸਾਰੀਆਂ ਚੁੱਪਾਂ ਹੀ ਚੁੱਪਾਂ…ਚੁੱਪਾਂ ਹੀ ਚੁੱਪਾਂ  ਹਨ…।
5. ਇਸ ਸੰਸਥਾ ਵੱਲੋਂ ਸਾਰੇ ਪੰਜਾਬ ਦੇ ਸ਼ਰਾਬ ਦੇ ਠੇਕਿਆਂ ਲਈ, ਅਹਾਤਿਆਂ ਲਈ ਕਰੇਂਦੇ ਅਤੇ ਜ਼ਿੰਦਾ ਡਾਂਸਰ ਦੇ ਪੱਛਮੀ ਸੱਭਿਆਚਾਰਕ ਪ੍ਰੋਗਰਾਮਾਂ ਲਈ ਮੁੰਡੇ/ਕੁੜੀਆਂ ਨੂੰ ਭਰਤੀ ਕਰਨ ਦਾ ਠੇਕਾ ਲਿਆ ਗਿਆ ਹੈ। ਜਿਸ ਦੌਰਾਨ ਭਰਤੀ ਕੀਤੇ ਪੜ੍ਹੇ ਲਿਖਿਆਂ ਨੂੰ ਠੇਕਿਆਂ ਉਪਰ, ਅਨਪੜ੍ਹਾਂ ਨੂੰ ਅਹਾਤਿਆ ਅਤੇ ਬੇਰੁਜ਼ਗਾਰਾਂ ਕੁਆਰੀਆਂ ਭੈਣਾਂ/ਕਾਕੀਆਂ ਨੂੰ ਜਿੰਦਾ ਡਾਂਸਰ ਲਈ ਮਾਡਲਿੰਗ ਤੌਰ ਤੇ ਡਿਊਟੀ ਨਿਭਾਉਣ ਲਈ ਸੇਵਾ ਦਾ ਮੌਕਾ ਹੋਵੇਗਾ ਅਤੇ ਇਸਦੇ ਨਾਲ ਹੀ ਸਾਨੂੰ ਇਹ ਵੀ ਪਤਾ ਹੈ ਕਿ ਬਹੁਤੀਆਂ ਕਾਕੀਆਂ ਇੰਨਾਂ ਕੰਮਾਂ ਚ ਨਿਪੁੰਨ ਹਨ ਬਾਕੀਆਂ ਨੂੰ ਨਾਲੋ-ਨਾਲ ਸਿਖਲਾਈ ਵੀ ਪ੍ਰਦਾਨ ਕੀਤੀ ਜਾਵੇਗੀ। ਸੰਸਥਾ ਦੀਆਂ ਲਾਗੂ ਹਦਾਇਤਾਂ ਅਨੁਸਾਰ ਕਾਕੀਆਂ ਪ੍ਰੋਗਰਾਮ ਸਾਦਾ ਵੀ ਅਤੇ ਅੰਗ ਪ੍ਰਦਸ਼ਨ ਪ੍ਰੋਗਰਾਮ ਪੇਸ਼ ਕਰਨ ਦੇ ਵੀ ਪਾਬੰਦ ਰਹਿਣਗੀਆਂ। ਵਿਅਹੁਤਾ ਬੀਬੀਆਂ ਨੂੰ ਵੀ ਰੁਜ਼ਗਾਰ ਦੇਣ ਲਈ ਸਾਡੀ ਸੰਸਥਾ ਵੱਲੋਂ ਭਾਰੀ ਛੋਟ ਹੈ।
ਨੋਟ:- ਅੱਜ ਤੱਕ ਇਸ ਧੰਦੇ ਦਾ ਕਾਰੋਬਾਰ ਪੰਜ ਸੌ ਕਰੋੜ ਤੱਕ ਚੜ੍ਹ ਚੁੱਕਾ ਹੈ ਅਤੇ ਆਉਣ ਵਾਲੇ ਸਮੇਂ ਵਿੱਚ ਭਾਰੀ ਤੇਜ਼ੀ ਨਾਲ ਵਧ ਰਿਹਾ ਹੈ। ਜਿਸ ਨਾਲ ਰਹਿ ਚੁੱਕੇ ਬਾਕੀ ਬੇਰੁਜ਼ਗਾਰਾਂ ਨੂੰ ਰੁਜ਼ਗਾਰ ਦੇ ਮੌਕੇ ਆਸਾਨੀ ਨਾਲ ਪ੍ਰਦਾਨ ਕਰਨ ਦੇ ਸ਼ਾਨਦਾਰ ਮੌਕੇ ਹਾਸਲ ਹੋਣਗੇ। ਕਿਉਂਕਿ ਅੱਗੇ ਤੋਂ ਕੈਮਿਸਟ ਸਟੋਰ ਵੀ ਅਸੀਂ ਠੇਕਿਆਂ ਉਪਰ ਹੀ ਲੈ ਰਹੇ ਹਾਂ। ਕੁਝ ਇੰਨ੍ਹਾਂ ਸਟੋਰਾਂ ਲਈ ਭਰਤੀ ਅਤੇ ਬਾਕੀਆਂ ਨੂੰ ਵਧ ਰਹੀ ਗੁੰਡਾਗਰਦੀ ‘ਚ ਭਰਤੀ ਕਰਕੇ ਰੁਜ਼ਗਾਰ ਲਈ ਸੁਨਹਿਰੀ ਮੌਕੇ ਪ੍ਰਦਾਨ ਕੀਤੇ ਜਾਇਆ ਕਰਨਗੇ। ਕੋਈ ਵੀ ਬੇਰੁਜ਼ਗਾਰ ਪਾਣੀ ਵਾਲੀ ਟੈਕੀ ਉਪਰ ਚੜ੍ਹਨ ਜਾਂ ਧਰਨੇ-ਮੁਜ਼ਾਹਰੇ ਕਰਨ ਲਈ ਮਜ਼ਬੂਰ ਨਹੀਂ ਹੋਵੇਗਾ।
ਮਿਲੋ:-  ਦਫਤਰ
   ਮੁੱਖ ਦੋਸ਼ੀ ਡਾਂਗ ਤੇ ਡੇਰਾ 
  ਅੰਨਾ ਪੀਹੇ ਕੁੱਤੀ ਚੱਟੇ ਰੋਡ
    ਅਸ਼ਲੀਲ ਵਸਤੀ
 ਕਸਬਾ ਆਦਮਖੋਰ, ਜ਼ਿਲ੍ਹਾ ਕੰਜਰਖਾਨਾ (ਖਾਨਾਖਰਾਬ)। 
ਪਿੰਨ ਕੋਡ:- ਜ਼ੀਰੋ……………………………420