ਨੈਣ

 

{ਚਰਨਜੀਤ ਸਿੰਘ ਪੰਨੂ}


ਨੈਣ ਸ਼ਰਬਤੀ ਹੁੰਦੇ ਖੁਸ਼ਬੂ ਵੰਡਣ ਨੂੰ
ਘੁੰਗਟ ਵਿੱਚ ਲਕੋਏ ਚੰਗੇ ਨਹੀਂ ਲਗਦੇ।
ਕਜਲਾ ਪਾਉ ਤਾਂ ਮਟਕਾਉਣਾ ਪੈਂਦਾ ਹੈ,
ਨੈਣਾਂ ਦੇ ਦਰ ਢੋਏ ਚੰਗੇ ਨਹੀਂ ਲਗਦੇ।
ਮੌਸਮ ਨਟਖਟ ਜਗਿਆਸਾ ਨੈਣਾਂ ਵਿੱਚ,
ਸੱਜਣ ਖੋਏ ਖੋਏ, ਚੰਗੇ ਨਹੀਂ ਲਗਦੇ।
ਸੁਨਹਿਰੀ ਸੁਪਨੇ ਘੜੇ ਜੋ ਅਰਮਾਨਾਂ ਨੇ,
ਬੁੱਕਲ ਅੰਦਰ ਮੋਏ ਚੰਗੇ ਨਹੀਂ ਲਗਦੇ।
ਨੈਣਾਂ ਦੀ ਬੇਸ਼ਕ ਚੋਰੀ ਕੀਤੀ ਨੈਣਾਂ ਨੇ,
ਕੈਦੋ ਸਤਰਕ ਹੋਏ ਚੰਗੇ ਨਹੀਂ ਲਗਦੇ।
ਵਿਛਾ ਕੇ ਪਲਕਾਂ ਢੋਲ ਸਵਾਇਆ ਜਦ,
ਉਣੀਦੇ ਜਾਗ ਖਲੋਏ ਚੰਗੇ ਨਹੀਂ ਲਗਦੇ।
ਦੁਸ਼ਮਣ ਕਰੇ ਅਨਹੋਣੀ ਸ਼ਿਕਵਾ ਨਾਹੀਂ,
ਮਿੱਤਰ ਛੁਰੀ ਖੁਭੋਏ ਚੰਗੇ ਨਹੀਂ ਲਗਦੇ।
ਪਲੇਠੀ ਪੂਣੀ ਵਸਲਾਂ ਵਾਲੀ ਕੱਤੀ ਨਹੀਂ,
ਤੱਕਲ਼ੇ ਵਿੰਗੇ ਹੋਵਣ ਚੰਗੇ ਨਹੀਂ ਲਗਦੇ।
ਪੋਖੋ ਬਹਾਨੇ ਚਰਖੀ ਮੁੱਢ ਬਿਠਾਇਆ ਸੀ,
ਧੂੰਏਂ ਦੇ ਪੱਜ ਰੋਏ, ਚੰਗੇ ਨਹੀਂ ਲਗਦੇ।
ਪਾਰ ਸਮੁੰਦਰ ਲੱਭਦੀ ਫਿਰਦੀ ਪੈੜਾਂ ਨੂੰ,
ਜੇ ਪੰਨੂ ਬੇਮੁਖ ਹੋਏ, ਚੰਗੇ ਨਹੀਂ ਲਗਦੇ।