ਲੁਧਿਆਣਾ : ੨੬ ਦਸੰਬਰ   
ਮੋਗਾ ਜ਼ਿਲੇ ਦੇ ਵਸਨੀਕ ਤੇ ਪੰਜਾਬੀ ਦੇ ਉਘੇ ਕਵੀ ਪ੍ਰੀਤਮ ਸਿੰਘ ਪ੍ਰੀਤ ਨੂੰ ਤੀਸਰਾ 'ਕੁਲਵੰਤ ਜਗਰਾਉਂ ਯਾਦਗਾਰੀ ਸਨਮਾਨ' ਨਾਲ ਸਨਮਾਨਿਤ ਕੀਤਾ ਗਿਆ । ਇਹ ਸਮਾਰੋਹ ਪੰਜਾਬੀ ਦੀ ਸਾਹਿਤਕ ਸੰਸਥਾ ਸਿਰਜਣਧਾਰਾ, ਲੁਧਿਆਣਾ ਵੱਲੋਂ ਪੰਜਾਬੀ ਭਵਨ ਲੁਧਿਆਣਾ ਵਿਖੇ ਆਯੋਜਿਤ ਕੀਤਾ ਗਿਆ । ਪ੍ਰਧਾਨਗੀ ਮੰਡਲ ਵਿਚ ਸਮਾਜ ਸੇਵੀ ਤੇ ਕਵੀ ਸ. ਈਸ਼ਰ ਸਿੰਘ ਸੋਬਤੀ, ਪੰਜਾਬੀ ਸਾਹਿਤ ਅਕਾਦਮੀ, ਲੁਧਿਆਣਾ ਦੇ ਪ੍ਰਧਾਨ ਪ੍ਰੋ: ਗੁਰਭਜਨ ਗਿੱਲ, ਸਭਾ ਦੇ ਪ੍ਰਧਾਨ ਸ੍ਰ. ਕਰਮਜੀਤ ਸਿੰਘ ਔਜਲਾ, ਸ. ਪ੍ਰੀਤਮ ਸਿੰਘ ਪ੍ਰੀਤ, ਇੰਜ: ਨਵਜੋਤ ਸਿੰਘ, ਡਾ. ਗੁਲਜ਼ਾਰ ਪੰਧੇਰ ਅਤੇ  ਪ੍ਰਸਿੱਧ ਨਾਵਲਕਾਰ ਜਸਵੰਤ ਸਿੰਘ ਕੰਵਲ ਮੁੱਖ ਮਹਿਮਾਨ ਵਜੋਂ ਸ਼ਾਮਿਲ ਹੋਏ। ਸਟੇਜ ਸੰਭਾਲਣ ਦੀ ਜਿੰਮੇਵਾਰੀ ਸ .ਗੁਰਸ਼ਰਨ ਸਿੰਘ ਨਰੂਲਾ ਨੇ ਬਾਖੂਬੀ ਨਿਭਾਉਂਦੇ ਹੋਏ ਕੁਲਵੰਤ ਜਗਰਾਉਂ ਦੇ ਜੀਵਨ ਤੇ ਰੋਸ਼ਨੀ ਪਾਈ ।

 

ਸ. ਸੋਬਤੀ ਸਿੰਘ ਨੇ ਆਪਣੇ ਵਿਚਾਰ ਰੱਖਦੇ ਕਿਹਾ ਕਿ ਕੁਲਵੰਤ ਜਗਰਾਉਂ ਇਕ ਬੜਾ ਹੀ ਸੁਹਿਰਦ, ਮਨੁੱਖਤਾ ਨੂੰ ਸਮਰਪਿਤ ਅਤੇ ਮਿੱਠ-ਬੋਲੜਾ ਸਾਹਿਤਕਾਰ ਸੀ ।
ਸ. ਜਸਵੰਤ ਸਿੰਘ ਕੰਵਲ ਨੇ ਕਿਹਾ ਕਿ ਭਾਵੇਂ ਪੰਜਾਬੀ ਸਾਹਿਤਕਾਰ ਥੋੜ੍ਹੇ ਹਨ ਪਰ ਜੇ ਹੰਭਲਾ ਮਾਰ ਕੇ ਸਰਕਾਰ ਨੂੰ ਜਗਾਇਆ ਜਾਵੇ ਤਾਂ ਪੰਜਾਬ, ਪੰਜਾਬੀ ਅਤੇ ਪੰਜਾਬੀਅਤ ਨੂੰ ਬਚਾਇਆ ਜਾ ਸਕਦਾ ਹੈ । 
ਪ੍ਰੋ: ਗੁਰਭਜਨ ਗਿੱਲ ਨੇ ਕੁਲਵੰਤ ਜਗਰਾਉਂ ਬਾਰੇ ਕਿਹਾ ਕਿ ਉਹ ਇੱਕ ਲੇਖਕ ਹੀ ਨਹੀਂ ਸੀ, ਸਗੋਂ ਇਕ ਸੰਸਥਾ  ਸੀ ਜਿਸ ਦੇ ਵਿਛੜ ਜਾਣ ਨਾਲ ਸਾਹਿਤ ਨੂੰ ਵੱਡਾ ਘਾਟਾ ਪਿਆ ਹੈ । 
ਸ. ਕਰਮਜੀਤ ਸਿੰਘ ਔਜਲਾ ਨੇ ਆਪਣੇ ਵਿਚਾਰ ਰੱਖਦੇ ਹੋਏ ਕਿਹਾ ਕਿ ਸਿਰਜਣਧਾਰਾ ਦੇ ਸਮੂਹ ਮੈਂਬਰਾਂ ਵੱਲੋਂ  ਕੁਲਵੰਤ ਜਗਰਾਉਂ ਦੀ ਯਾਦ ਨੂੰ ਜਿਊਂਦੇ ਰੱਖਣਾ ਪੰਜਾਬੀ  ਸਾਹਿਤ  ਪ੍ਰਤੀ ਪਿਆਰ ਅਤੇ ਸਾਹਿਤਕਾਰ ਪ੍ਰਤੀ ਮਿੱਤਰਤਾ ਦੀ ਅਦੁੱਤੀ ਮਿਸਾਲ ਹੈ। 
ਦਲਵੀਰ ਸਿੰਘ ਲੁਧਿਆਣਵੀ ਨੇ ਕੁਲਵੰਤ ਜਗਰਾਉਂ ਦੇ ਸਾਹਿਤਕ ਜੀਵਨ ਬਾਰੇ ਪਰਚਾ ਪੜ੍ਹਿਆ, ਜਦਕਿ ਡਾ. ਸਤੀਸ਼ ਚੰਦਰ ਨੇ ਸ. ਪ੍ਰੀਤਮ ਸਿੰਘ ਪ੍ਰੀਤ ਤੇ ਪਰਚਾ ਪੜ੍ਹਦਿਆਂ ਕਿਹਾ ਕਿ ਪ੍ਰੀਤ ਦੀਆਂ ਸੂਖਮਭਾਵੀ ਕਵਿਤਾਵਾਂ ਪਾਠਕ ਨੂੰ ਵਿਸਮਾਦੀ ਮੰਡਲ ਵਿਚ ਲੈ ਜਾਂਦੀਆਂ ਹਨ । 
ਉਪਰੰਤ ਕਵੀ ਦਰਬਾਰ ਕਰਵਾਇਆ ਗਿਆ ਜਿਸ ਵਿਚ ਤ੍ਰੈਲੋਚਨ ਲੋਚੀ, ਅਸ਼ੋਕ ਚਟਾਨੀ, ਸੁਖਵੰਤ ਸਿੰਘ ਮਰਵਾਹਾ ਹਰਭਜਨ ਧਰਨਾ, ਜਗੀਰ ਸਿੰਘ ਪ੍ਰੀਤ,ਅਮਰਜੀਤ ਸ਼ੇਰਪੁਰੀ, ਰਵਿੰਦਰ ਸਿੰਘ ਦੀਵਾਨਾ, ਕੁਲਵਿੰਦਰ ਕੌਰ ਧੀਮਾਨ, ਇੰਜ. ਸੁਰਜਨ ਸਿੰਘ, ਗੁਰਦੀਸ਼ ਕੌਰ ਗਰੇਵਾਲ, ਪਰਮਜੀਤ ਕੌਰ ਮਹਿਕ, ਜਗਸ਼ਰਨ ਸਿੰਘ ਛੀਨਾ, ਜੋਗਿੰਦਰ ਸਿੰਘ ਕੰਗ, ਸੱਖ ਧੂੜਕੋਟੀਆ ਆਦਿ ਨੇ ਰਚਨਾਵਾਂ ਪੜ੍ਹ ਕਿ ਮਹਿਫਲ ਨੂੰ ਚਾਰ ਚੰਨ ਲਗਾ ਦਿੱਤੇ ।     
ਇਸ ਸਮਾਰੋਹ ਵਿਚ ਬਹੁਤ ਸਾਰੇ ਸਾਹਿਤਕਾਰ, ਸਾਹਿਤ-ਪ੍ਰੇਮੀ ਅਤੇ ਉਚ ਕੋਟੀ ਦੇ ਵਿਦਵਾਨਾਂ ਸ਼ਿਰਕਤ ਕੀਤੀ, ਜਿਨ੍ਹਾਂ 'ਚ ਮੁੱਖ ਇਹ ਸਨ, ਪ੍ਰੋ:ਰਵਿੰਦਰ ਭੱਠਲ, ਸੁਭਾਸ਼ ਗੁਪਤਾ ਡੀਪੀਆਰਓ, ਸਤੀਸ਼ ਗੁਲਾਟੀ, ਪਿੰ੍ਰ : ਪ੍ਰੇਮ ਸਿੰਘ ਬਜਾਜ,ਪਿੰ: ਇੰਦਰਪਾਲ ਕੌਰ ਭਿੰਡਰ, ਦਵਿੰਦਰ ਸੇਖਾ, ਡਾ. ਕੁਲਵਿੰਦਰ ਕੌਰ ਮਿਨਹਾਸ, ਮੇਜਰ ਸਿੰਘ ਚਾਹਲ ਧਰਮਕੋਟ, ਮਹਿੰਦਰਦੀਪ ਗਰੇਵਾਲ, ਦਲਜੀਤ ਸਿੰਘ ਦਰਦੀ, ਗੁਰਦਿਆਲ ਸ਼ੌਕੀ, ਭਗਵਾਨ ਢਿੱਲੋ,  ਹਰਜਿੰਦਰ ਤੂਰ, ਬੁੱਧ ਸਿੰਘ ਨੀਲੋ, ਪਰਗਟ ਸਿੰਘ ਔਜਲਾ, ਆਦਿ ਹਾਜ਼ਿਰ ਸਨ ।
ਸਭਾ ਦੇ ਸੀਨੀਅਰ ਮੀਤ ਪ੍ਰਧਾਨ ਦਵਿੰਦਰ ਸਿੰਘ ਸੇਖਾ ਨੇ ਆਏ ਹੋਏ ਵਿਦਵਾਨਾਂ, ਸਾਹਿਤਕਾਰਾਂ ਤੇ ਸਾਹਿਤ ਪ੍ਰੇਮੀਆ ਦਾ ਧੰਨਵਾਦ ਕੀਤਾ । 
( ਦਲਵੀਰ ਸਿੰਘ ਲੁਧਿਆਣਵੀ ), ਸਕੱਤਰ,  (ਮੋ) ੯੪੧੭੦ ੦੧੯੮੩