ਲੁਧਿਆਣਾ: ( ਦਲਵੀਰ ਸਿੰਘ ਲੁਧਿਆਣਵੀ) ਪੰਜਾਬੀ ਦੀ ਪ੍ਰਮੁੱਖ ਸਾਹਿੱਤਕ ਸੰਸਥਾ 'ਸਿਰਜਣਧਾਰਾ' ਵੱਲੋਂ ਪੰਜਾਬੀ ਸਾਹਿਤ ਅਕਾਡਮੀ ਦੀ ਨਵੀਂ ਟੀਮ ਦਾ ਸਵਾਗਤੀ ਸਨਮਾਨ ਅਤੇ ਸਰਦਾਰ ਗੁਰਨਾਮ ਸਿੰਘ ਕੋਮਲ ਦਾ ਕਾਵਿ-ਸੰਗ੍ਰਹਿ, “ਆਖਰੀ ਸੁਗਾਤ” ਲੋਕ ਅਰਪਣ ਪੰਜਾਬੀ ਭਵਨ, ਲੁਧਿਆਣਾ ਵਿਖੇ ਕੀਤਾ ਗਿਆ। ਇਸ ਮੌਕੇ 'ਤੇ 'ਸੇਵਾ ਲਹਿਰ' ਦਾ ਨਵਾਂ ਅੰਕ ਵੀ ਰਿਲੀਜ਼ ਕੀਤਾ ਗਿਆ । ਪ੍ਰਧਾਨਗੀ ਮੰਡਲ ਵਿਚ ਪੰਜਾਬੀ ਸਾਹਿਤ ਅਕਾਡਮੀ ਦੇ ਪ੍ਰਧਾਨ ਪ੍ਰੋ: ਗੁਰਭਜਨ ਗਿੱਲ, ਸਭਾ ਦੇ ਪ੍ਰਧਾਨ ਸ. ਕਰਮਜੀਤ ਸਿੰਘ ਔਜਲਾ, ਪ੍ਰਿੰ: ਪ੍ਰੇਮ ਸਿੰਘ ਬਜਾਜ, ਸ੍ਰੀ ਸੁਰਿੰਦਰ ਕੈਲੇ ਅਤੇ ਮੁੱਖ ਮਹਿਮਾਨ ਵਜੋਂ ਪ੍ਰੋ: ਨਿਰੰਜਨ ਤਸਨੀਮ ਸ਼ਾਮਿਲ ਹੋਏ । ਮੰਚ ਸੰਚਾਲਨ ਦੀ ਜ਼ਿੰਮੇਵਾਰੀ ਗੁਰਸ਼ਰਨ ਸਿੰਘ ਨਰੂਲਾ ਨੇ ਬਾਖੂਬੀ ਨਿਭਾਈ ।
ਪ੍ਰੋ: ਗੁਰਭਜਨ ਗਿੱਲ ਨੇ ਆਪਣੇ ਵਿਚਾਰ ਰੱਖਦੇ ਹੋਏ ਕਿਹਾ ਕਿ ਸਿਰਜਣਧਾਰਾ ਸਾਹਿਤ ਸਿਰਜਕਾਂ ਦੀ ਸੰਸਥਾ ਹੈ ਜੋ ਨਵੇਂ ਲੇਖਕਾਂ ਨੂੰ ਉਸਾਰੂ ਸੇਧ ਦੇ ਕੇ ਇੱਕ ਸ਼ਲਾਘਾਯੋਗ ਕਾਰਜ ਕਰ ਰਹੀ ਹੈ ਅਤੇ ਸਾਈ ਮੀਆਂ ਪੁਸਤਕ ਬਾਜ਼ਾਰ ਨੂੰ ਪੂਰਾ ਕਰਨਾ ਸਾਡਾ ਫਰਜ਼ ਹੈ । ਉਨ੍ਹਾਂ ਇਹ ਵੀ ਕਿਹਾ ਕਿ ਗੁਰਨਾਮ ਸਿੰਘ ਕੋਮਲ ਨੇ “ਆਖਰੀ ਸੁਗਾਤ” ਵਿਚ ਜੋ ਰਚਨਾਵਾਂ ਰਚੀਆਂ ਹਨ ਉਹ ਸਾਂਭਣਯੋਗ ਹਨ। ਪ੍ਰੋ: ਨਿਰੰਜਨ ਤਸਨੀਮ ਨੇ ਕਿਹਾ ਕਿ ਪ੍ਰੋ: ਗੁਰਭਜਨ ਗਿੱਲ ਦੇ ਪ੍ਰਧਾਨ ਬਣਨ ਨਾਲ ਸਾਹਿਤਕਾਰਾਂ ਦੀਆਂ ਉਨ੍ਹਾਂ ਪ੍ਰਤੀ ਆਸ਼ਾਵਾਂ ਵੱਧ ਗਈਆਂ ਹਨ, ਉਮੀਦ ਹੈ ਕਿ ਉਹ ਅਧੂਰੇ ਪਏ ਕੰਮਾਂ ਨੂੰ ਪਹਿਲ ਦੇ ਆਧਾਰ ਤੇ ਨੇਪੜੇ ਚਾੜ੍ਹਨਗੇ ।
ਸ. ਕਰਮਜੀਤ ਸਿੰਘ ਔਜਲਾ ਨੇ ਆਪਣੇ ਵਿਚਾਰ ਪੇਸ਼ ਕਰਦੇ ਕਿਹਾ ਕਿ ਪੰਜਾਬੀ ਸਾਹਿਤ ਅਕਾਡਮੀ ਦੀ ਚੁਣੀ ਗਈ ਨਵੀਂ ਟੀਮ ਨੂੰ ਸਿਰਜਣਧਾਰਾ ਵੱਲੋਂ ਹਰ ਪੱਖ ਤੋਂ ਸਹਿਯੋਗ ਦਿੱਤਾ ਜਾਵੇਗਾ ਅਤੇ ਸਰਦਾਰ ਗੁਰਨਾਮ ਸਿੰਘ ਕੋਮਲ ਨੇ ਆਪਣੀ ਪੁਸਤਕ 'ਆਖਰੀ ਸੁਗਾਤ' ਵਿੱਚ ਧਾਰਮਿਕ ਅਤੇ ਸੱਭਿਆਚਾਰਕ ਰਚਨਾਵਾਂ ਰਚੀਆਂ ਹਨ ਜੋ ਸਮਾਜ ਨੂੰ ਨਿੱਗਰ ਸੇਧ ਦੇਣਗੀਆਂ । ਉਨਾਂ ਇਹ ਵੀ ਕਿਹਾ ਕਿ ਪ੍ਰੋ: ਨਰਿੰਜਨ ਤਸਨੀਮ ਹੁਰਾਂ ਨੇ 'ਐਟ ਦਾ ਕਰਾਸ ਰੋਡਸ' ਅੰਗਰੇਜ਼ੀ ਟ੍ਰਿਬਿਊਨ ਵਿਚ ਜਿਹੜਾ ਕਾਲਮ ਛਪਦਾ ਹੈ, ਉਸ ਨੁੂੰ ਦਸ ਸਾਲ ਹੋ ਗਏ ਹਨ ਜਿਸ ਰਾਹੀਂ ਉਹ ਸਾਹਿਤਕਾਰਾਂ ਅਤੇ ਸਾਹਿਤ ਬਾਰੇ ਜਾਣਕਾਰੀ ਭਰੁਪੂਰ ਲੇਖ ਲਿਖਦੇ ਹਨ, ਸਾਨੂੰ ਸਭ ਨੂੰ ਉਨ੍ਹਾਂ 'ਤੇ ਮਾਣ ਹੈ । ਪ੍ਰਿੰ: ਪ੍ਰੇਮ ਸਿੰਘ ਬਜਾਜ ਨੇ ਆਪਣਾ ਵਿਚਾਰਾਂ ਵਿਚ ਕਿਹਾ ਕਿ ਉਹ ਸੰਸਥਾ ਜਿਸ ਦੇ ਬਾਸ਼ਿੰਦੇ ਮਿਹਨਤੀ ਤੇ ਹੌਸਲੇ ਵਾਲੇ ਹੋਣ ਸਦਾ ਹੀ ਤਰੱਕੀ ਵੱਲ ਜਾਂਦੀ ਹੈ । ਸਰਦਾਰ ਗੁਰਨਾਮ ਸਿੰਘ ਕੋਮਲ ਨੂੰ ਉਨ੍ਹਾਂ ਦੀ ਇਸ ਪਰਪੱਕ ਲਿਖਤ ਲਈ ਸ. ਭਾਗ ਸਿੰਘ ਭਮਰਾ, ਗੁਰਮੀਤ ਸਿੰਘ ਬਿਰਦੀ, ਬਲਬੀਰ ਸਿੰਘ ਬੱਲੀ ਅਤੇ ਸ. ਸਤਨਾਮ ਸਿੰਘ ਨੇ ਸਨਮਾਨਿਤ ਕੀਤਾ ।
ਇਸ ਮੌਕੇ 'ਤੇ ਮੀਤ ਪ੍ਰਧਾਨ ਸ੍ਰੀ ਸੁਰਿੰਦਰ ਕੈਲੇ, ਸੁਰਿੰਦਰ ਰਾਮਪੁਰੀ, ਸ੍ਰੀਮਤੀ ਗੁਰਚਰਨ ਕੌਰ ਕੋਚਰ, ਡਾ. ਨਿਰਮਲ ਜੌੜਾ, ਤ੍ਰੈਲੋਚਨ ਲੋਚੀ, ਡਾ. ਸਰੂਪ ਸਿੰਘ ਅਲੱਗ, ਡਾ. ਸਵਰਨਜੀਤ ਕੌਰ ਗਰੇਵਾਲ, ਦਵਿੰਦਰ ਸੇਖਾ, ਦਲਵੀਰ ਸਿੰਘ ਲੁਧਿਆਣਵੀ, ਆਦਿ ਨੇ ਵੀ ਆਪੋ-ਆਪਣੇ ਵਿਚਾਰ ਰੱਖੇ। ਉਪਰੰਤ ਕਵੀ ਦਰਬਾਰ ਕਰਵਾਇਆ ਗਿਆ, ਜਿਸ ਵਿਚ ਹਰਭਜਨ ਧਰਨਾ, ਹਰਦੇਵ ਸਿੰਘ ਕਲਸੀ, ਪਰਗਟ ਸਿੰਘ ਇਕੋਲਾਹਾ, ਸੁਰਜੀਤ ਸਿੰਘ ਅਲਬੇਲਾ, ਚਰਨਜੀਤ ਸਿੰਘ ਦੋਸ਼ੀ, ਸਤੀਸ਼ ਗੁਲਾਟੀ, ਦਲਬੀਰ ਸਿੰਘ ਕਲੇਰ, ਸਪੂਰਨ ਸਿੰਘ ਸਨਮ, ਗੁਰਦੀਸ਼ ਕੌਰ ਗਰੇਵਾਲ, ਰਜਿੰਦਰ ਨਾਥ ਸ਼ਰਮਾ, ਜੋਗਿੰਦਰ ਸਿੰਘ ਕੰਗ, ਬਲਵੰਤ ਸਿੰਘ ਸਨੇਹੀ, ਅਮਰਜੀਤ ਸਿੰਘ ਸ਼ੇਰਪੁਰੀ, ਐਮ ਡੀ ਕਲਾਮ, ਆਦਿ ਨੇ ਆਪੋ ਆਪਣੀ ਰਚਾਵਾਂ ਪੇਸ਼ ਕਰਕੇ ਸਭਿਆਚਾਰਕ ਵਿਰਸੇ ਦੀ ਝੜੀ ਲਗਾ ਦਿੱਤੀ ।
ਇਸ ਸਮਾਗਮ ਵਿਚ ਹੋਰ ਵੀ ਬੁੱਧੀਜੀਵੀ ਡਾ. ਗੁਰਇਕਬਾਲ ਸਿੰਘ, ਸੁਰਜੀਤ ਜੱਜ, ਪ੍ਰਿੰ: ਇੰਦਰਜੀਤ ਪਾਲ ਕੌਰ ਭਿੰਡਰ, ਜਸਵਿੰਦਰ ਧਨਾਨਸੂ, ਤੇਜਾ ਸਿੰਘ ਸਾਜਨ, ਸੁਰਜੀਤ ਲਾਂਬੜਾ, ਕੁਲਵਿੰਦਰ ਕੌਰ, ਗੁਰਬਚਨ ਸਿੰਘ ਲਾਡਪੁਰੀ, ਪਵਨਦੀਪ ਕੌਰ ਬਾਜਵਾ, ਐਮ ਡੀ ਅਫਸ਼ਾ, ਸੁਖਵਿੰਦਰ ਸਿੰਘ, ਇੰਜ: ਸੁਰਜਨ ਸਿੰਘ, ਅਕਵੰਤ ਕੌਰ ਬਾਜਵਾ, ਜਗਜੀਤ ਸਿੰਘ, ਆਤਮਾ ਸਿੰਘ ਮੁਕਤਸਰੀ, ਗੰਗਾ ਰਾਮ, ਅਮਰਜੀਤ ਕੌਰ ਹਿਰਦੇ, ਅਦਿ ਸ਼ਾਮਿਲ ਸਨ ।