ਰੀਸ ਕਰੀਏ ਨਾ ਆਪ ਤੋਂ ਵੱਡਿਆਂ ਦੀ,
ਸਦਾ ਰਹੀਏ ਔਕਾਤ ਦੇ ਵਿੱਚ ਲੋਕੋ।
ਉਹਨਾਂ ਦੇ ਕਹੇ ਕਦੇ ਨਾ ਸਿਖ਼ਰ ਚੜੀਏ,
ਚਾੜ ਕੋਠੇ ਜੋ ਪੌੜੀ ਲੈਣ ਖਿੱਚ ਲੋਕੋ|
ਹਾਂ ਦੇ ਵਿੱਚ ਨਾ ਕਦੇ ਵੀ ਹਾਂ ਭਰੀਏ,
ਪਿੱਛੋਂ ਲੋਕਾਂ 'ਚ ਕਰਨ ਜੋ ਜਿੱਚ ਲੋਕੋ।
ਵਿੜੀ ਸਿੜੀ ਨਾ ਓਸ ਦੇ ਨਾਲ ਨਿਭਦੀ,
ਜੀਹਦੇ ਨਾਲ ਨਹੀਂ ਬੈਠਦੀ ਪਿੱਚ ਲੋਕੋ|
ਉਹਨੂੰ ਦਿਲ ਦਾ ਭੇਦ ਨਾ ਕਦੇ ਦੇਈਏ,
ਜੋ ਤੁਹਾਡੀ ਗੱਲ ਨੂੰ ਸਮਝਦਾ ਟਿੱਚ ਲੋਕੋ।
ਪਸੀਨਾ ਡੁੱਲ੍ਹੇ ਤੋਂ ਖ਼ੂਨ ਜੋ ਡੋਲ੍ਹਦਾ ਹੈ,
ਖੜੀਏ ਓਸ ਨਾਲ ਤਾਣ ਕੇ ਹਿੱਕ ਲੋਕੋ|
ਹਾਮੀ ਓਸ ਲਈ ਕਦੇ ਵੀ ਨਾ ਭਰਿਓ,
ਪੈਂਦੀਆਂ ਵਿੱਚ ਵਿਖਾਵੇ ਜੋ ਪਿੱਠ ਲੋਕੋ।
ਮੂੰਹ ਤੇ ਆਈ ਗੱਲ ਕਦੀ ਰੁੱਕਦੀ ਨਾ,
ਸੁਣਾ ਦੇਈਏ ਜੋ ਚਿੱਤ ਦੇ ਵਿੱਚ ਲੋਕੋ|
ਨਬੇੜ ਲਈਏ ਬੈਠਕੇ ਗੱਲ ਸਾਰੀ,
ਝਗੜਾ ਰੱਖੀਏ ਨਾ ਘਰ 'ਚ ਨਿੱਤ ਲੋਕੋ।
'ਦੱਦਾਹੂਰੀਏ ਨੇ ਕਹਿ ਲਈਆਂ ਦਿਲ ਦੀਆਂ,
ਵੇਖੋ ਕਿਹੜੀ ਕਿਸਦੇ ਬੈਠਦੀ ਫਿੱਟ ਲੋਕੋ|