ਅੱਗ ਵਾਗੂੰ ਤਪਦੇ ਜੇਠ ਮਹੀਨੇ ਵਿੱਚ ਪੰਜਾਬ ਅੰਦਰ ਠੰਡੇ ਮਿੱਠੇ ਜਲ ਦੀਆਂ ਛਬੀਲਾਂ ਲਾਉਣ ਦੀ ਰਵਾਇਤ ਕਰਕੇ ਇਸ ਪਿੰਡ ਦੇ ਬਾਹਰ ਅੱਡੇ ਤੇ ਵੀ ਠੰਡੇ ਮਿੱਠੇ ਜਲ ਦੀ ਛਬੀਲ ਲੱਗੀ ਸੀ ਤੇ ਸੇਵਾਦਾਰ ਹਰ ਆਉਣ ਜਾਣ ਵਾਲੇ ਵਹੀਕਲ ਨੂੰ ਰੋਕ ਕੇ ਉਹਨਾਂ ਵਿੱਚ ਬੈਠੇ ਮੁਸਾਫਰਾਂ ਨੂੰ ਮਿੰਨਤਾਂ ਤਰਲੇ ਕੱਢ ਕੇ ਉਹਨਾਂ ਨੂੰ ਠੰਡਾ ਮਿੱਠਾ ਜਲ ਛਕਾ ਰਹੇ ਸਨ। ਦੇਖਦੇ ਦੇਖਦੇ ਉਥੇ ਰੌਲਾ ਰੱਪਾ ਜਿਹਾ ਪੈ ਗਿਆ -ਲੜੌ ਲੜਾਈ ਸ਼ੁਰੂ ਹੋ ਗਈ ਪਤਾ ਕਰਨ ਤੇ ਮਾਲੂਮ ਹੋਇਆ ਕਿ ਇਸੇ ਪਿੰਡ ਦੇ ਵਾਸੀ ਕਿਸੇ ਮਾਨਸਿਕ ਰੋਗੀ ਗੁਲਾਬੂ ਨੇ ਪੰਜ ਸੱਤ ਗਲਾਸ ਜਲ ਦੇ ਛਕ ਕੇ ਆਪਣਾ ਜੂਠਾ ਗਲਾਸ ਛਬੀਲ ਵਾਲੇ ਠੰਡੇ ਮਿੱਠੇ ਜਲ ਦੇ ਟੱਬ ਵਿੱਚ ਸੁੱਟ ਦਿਤਾ ਸੀ ਤੇ ਹੁਣ ਛਬੀਲ ਦੇ ਸੇਵਾਦਾਰ ਛਬੀਲ ਛੱਡ ਕੇ ਘਸੁੰਨ ਮੁੱਕੀਆਂ ਅਤੇ ਗੰਦੀਆਂ ਗਾਲਾਂ ਕੱਢਦੇ ਹੋਏ ਉਸ ਵਿਚਾਰੇ ਗੁਲਾਬੂ ਦੀ ਸੇਵਾ ਵਿੱਚ ਰੁੱਝ ਗਏ ਸਨ।