ਅਸਾਡੇ ਨਾਲ ਘੱਟ ਕੋਈ ਨਾ ਕੀਤੀ ਇਸ ਜ਼ਮਾਨੇ ਨੇ ,
ਤਾਂ ਕੀ ਹੋਇਆ ਜੇ ਕੁਝ ਕਹਿ ਦਿੱਤਾ ਇਸ ਨੂੰ ਦਿਲ ਦੀਵਾਨੇ ਨੇ ।
ਜਿਦ੍ਹੇ ਸਿਰ ਤੇ ਹਵਾ ਵਿੱਚ ਉੱਡਣ ਦਾ ਲੈ ਬੈਠੇ ਸਾਂ ਸੁਪਨਾ ,
ਜਮੀਂ ਤੇ ਮਾਰਿਆ ਪਟਕਾ ਕੇ ਉਸ ਦੇ ਇਕ ਬਹਾਨੇ ਨੇ ।
ਜਿਦ੍ਹੇ ਦੋਸਤ ਜਿਨੂੰ ਕਹਿੰਦੇ ਨੇ ਰਹਿੰਦੇ ਐਸ਼ ਕਰਨੇ ਨੂੰ ,
ਹਮੇਸ਼ਾ ਉਸ ਦੇ ਖੀਸੇ ਚੋਂ ਤਾਂ ਨਿਕਲੇ ਇਕ , ਦੋ ਆਨੇ ਨੇ ।
ਖਾ ਕੇ ਗੈਰਾਂ ਤੋਂ ਧੋਖਾ , ਅਜ਼ਮਾ ਕੇ ਆਪਣੇ ਪਤਾ ਲੱਗਾ ,
ਕੋਈ ਨਾ ਆਪਣਾ ਇਸ ਦੁਨੀਆ ਦੇ ਵਿੱਚ , ਸਭ ਬੇਗਾਨੇ ਨੇ ।
ਇਹ ਦੱਸੇ ਕੌਣ ਬੰਦੇ ਨੂੰ ਕਿ ਗਮ ਵੀ ਇਕ ਖਜ਼ਾਨਾ ਹੈ ,
ਦੀਵਾਨਾ ਇਸ ਨੂੰ ਕਰ ਛੱਡਿਆ ਹੈ , ਖੁਸ਼ੀਆਂ ਦੇ ਖਜਾਨੇ ਨੇ ।
ਹੋਇਆ ਕਾਇਮ ਹੈ ਖੁਦਗਰਜ਼ੀ ਦੇ ਸਿਰ ਤੇ ਦੋਸਤੋ ਜਿਹੜਾ ,
ਪਰਖ ਦੀ ਨ੍ਹੇਰੀ ਆਵਣ ਤੇ ਨਾ ਰਹਿਣਾ ਉਸ ਯਰਾਨੇ ਨੇ ।