ਰੋਟੀ ਖਾਤਰ ਤਰਸ ਰਹੇ ਨੇ ਮੇਰੇ ਮਾਂ ਤੇ ਬਾਪ,
ਤੂੰ ਹੀ ਦੱਸ ਮੈਂ ਕਿੰਜ ਕਰਾਂ ਹੁਣ ਤੇਰੇ ਨਾਂ ਦਾ ਜਾਪ?
ਪੰਡਤ ਜੀ, ਚੁਪ ਕਰਕੇ ਇੱਥੋਂ ਛੇਤੀ ਹੋਵੋ ਚਲਦੇ,
ਮੈਂ ਆਪਣੀ ਵਿਗੜੀ ਤਕਦੀਰ ਸੁਆਰ ਲਵਾਂਗਾ ਆਪ।
ਜ਼ੁਲਮਾਂ ਦੀ ਚੱਕੀ ਵਿੱਚ ਪਿਸਦੇ ਰਹਿਣੇ ਨੇ ਉਹ ਲੋਕ,
ਜੋ ਆਪਣੇ ਹੱਕਾਂ ਲਈ ਲੜਨਾ ਸਮਝ ਰਹੇ ਨੇ ਪਾਪ।
ਜੇ ਕਰ ਲੋਕਾਂ ਨੂੰ ਇਹ ਸਾਧੂ ਦੇ ਸਕਦਾ ਵਰਦਾਨ,
ਦਰ ਦਰ ਉੱਤੇ ਧੱਕੇ ਖਾਂਦਾ ਇਹ ਕਿਉਂ ਫਿਰਦਾ ਆਪ?
ਅੱਜ ਕਲ ਲੋਕੀਂ ਪੀਈ ਜਾਂਦੇ ਦਾਰੂ ਪਾਣੀ ਵਾਂਗ,
ਭਾਵੇਂ ਥਾਂ-ਥਾਂ ਲਿਖਿਆ ਮਿਲਦਾ, 'ਦਾਰੂ ਪੀਣਾ ਪਾਪ।'
ਉਹ ਰੱਬ ਦੇ ਨਾਂ ਉੱਤੇ ਅੱਗ ਬਬੂਲਾ ਹੋ ਜਾਂਦਾ ਹੈ,
ਘਰ ਦੇ ਜਿਸ ਨੂੰ ਹਾਕਾਂ ਮਾਰਨ ਕਹਿ ਕਹਿ ਕੇ 'ਹਰਜਾਪ।'
ਮਹਿਲਾਂ ਵਾਲੇ ਦੋਸਤ ਤੇਰੇ , ਵੈਰੀ ਛੰਨਾਂ ਵਾਲੇ,
ਤੂੰ ਆਪੇ ਸੋਚ, ਤੇਰਾ ਮੇਰਾ ਹੋਊ ਕਿੰਜ ਮਿਲਾਪ?