ਮੋਟਰਾਂ ਦੇ ਨਾਲੋਂ ਵੀਰੋ, ਸਾਇਕਲ ਸਵਾਰੀ ਚੰਗੀ ,
ਹਰ ਰੋਜ਼ ਥੋੜ੍ਹੀ ਬਹੁਤੀ , ਸਾਇਕਲ ਚਲਾਈਏ ਜੀ ।
ਜਾਣਾ ਜੇ ਬਾਜ਼ਾਰ ਹੋਵੇ, ਸਬਜੀ ਹੈ ਲੈਕੇ ਆਉਣੀ ,
ਛੱਡ ਕੇ ਸਕੂਟਰ ਨੂੰ , ਸਾਈਕਲ ਤੇ ਜਾਈਏ ਜੀ ।
ਹੋਰ ਨਿੱਕੇ ਮੋਟੇ ਕੰਮ , ਹੋਣ ਨੇੜੇ - ਤੇੜੇ ਜੋ ਵੀ ,
ਐਸੇ ਕੰਮਾਂ ਲਈ ਹੀਰੋ , ਹਾਂਡੇ ਨਾ ਭਜਾਈਏ ਜੀ ।
ਗੋਡੇ ਨਾ ਖਲੋਣ ਕਦੇ , ਮੁੱਕੇ ਨਾ ਗਰੀਸ ਬਾਬਾ ,
ਵਰਜਿਸ਼ ਨਾਲੇ ਪੈਸੇ , ਤੇਲ ਦੇ ਬਚਾਈਏ ਜੀ ।
ਮੋਟਰਾਂ ਦਾ ਧੂੰਆਂ ਮਾੜਾ , ਦੂਸ਼ਿਤ ਹਵਾ ਨੂੰ ਕਰੇ ,
ਹੁੰਦਾ ਪ੍ਰਦੂਸ਼ਣ ਜੋ , ਓਸ ਨੂੰ ਘਟਾਈਏ ਜੀ ।
ਹਾਰਨਾ ਦਾ ਸ਼ੋਰ ਘਟੂ , ਕਿੰਨੀ ਫਾਇਦੇਮੰਦ ਬਾਤ ,
ਸਾਇਕਲ ਦੀ ਹੌਲੀ ਹੌਲੀ, ਟੱਲੀ ਨੂੰ ਵਜਾਈਏ ਜੀ ।
ਚੀਜ਼ ਚੰਗੀ ਗੁਣਕਾਰੀ , ਭੋਰਾ ਨੁਕਸਾਨ ਹੈਨੀਂ ,
ਆਪਾਂ ਸਾਰੇ ਆਦਤ ਜੇ, ਸਾਈਕਲ ਦੀ ਪਾਈਏ ਜੀ ।
ਕਹਿਣੀ "ਪ੍ਰਵੀਨ" ਗੱਲ , ਦੂਜੇ ਨੂੰ ਆਸਾਨ ਹੁੰਦੀ ,
ਚੰਗੀ ਗੱਲ ਦੂਜੇ ਨਾਲੋਂ, ਪਹਿਲਾਂ ਅਪਨਾਈਏ ਜੀ ।