ਲੰਘਿਆ ਵੀਹ ਸੌ ਉਨੀਂ ਵੀਹ ਸੌ ਵੀਹ ਚੜ ਆਇਆ ਏ
ਛੰਦ ਨਵਾਂ ਇੱਕ ਰਚਕੇ ਮੈਂ ਨਵੇਂ ਸਾਲ ਤੇ ਪਾਇਆ ਏ ,
ਲੱਖ ਲੱਖ ਵਾਰ ਵਧਾਈ ਹਰ ਇੱਕ ਮਿੱਤਰ ਪਿਆਰੇ ਨੂੰ
ਇਹ ਨਵਾਂ ਸਾਲ ਲੈ ਆਵੈ , ਪਿਆਰ ਤੇ ਭਾਈਚਾਰੇ ਨੂੰ ।
ਖੁਸ਼ੀਆਂ ਭਰਿਆ ਦਾਤਾ ਇਹ ਸਭਨਾਂ ਲਈ ਸਾਲ ਰਹੇ
ਤੇਰੀ ਰਹਿਮਤ ਸਦਕਾ ਸਭਦਾ ਚੰਗਾ ਈਂ ਹਾਲ ਰਹੇ ,
ਖੁਸ਼ਹਾਲ ਰੱਖੀਂ ਹਰ ਪਿੰਡ ਸ਼ਹਿਰ ਤੇ ਦੇਸ਼ ਹਮਾਰੇ ਨੂੰ
ਇਹ ਨਵਾਂ ਸਾਲ ਲੈ ਆਵੈ , ਪਿਆਰ ਤੇ ਭਾਈਚਾਰੇ ਨੂੰ ।
ਨਾ ਮੋਢਿਆਂ ਉੱਤੇ ਭਾਰ ਚੁਕਾਈ ਗੱਭਰੂ ਪੁੱਤਾਂ ਦੇ
ਸੁਹਾਗ ਕਿਸੇ ਦਾ ਖੋਹ ਨਾ ਲਈ ਵਿੱਚ ਜੋਬਨ ਰੁੱਤਾਂ ਦੇ ,
ਬਖਸ਼ੀ ਉਮਰਾਂ ਲੰਮੀਆਂ ਹਰ ਇੱਕ ਅੱਖ ਦੇ ਤਾਰੇ ਨੂੰ
ਇਹ ਨਵਾਂ ਸਾਲ ਲੈ ਆਵੈ , ਪਿਆਰ ਤੇ ਭਾਈਚਾਰੇ ਨੂੰ ।
ਨਾਹੀਂ ਜਾਨ ਕਿਸੇ ਦੀ ਜਾਵੇ ਕੀਮਤੀ ਬਿਨਾਂ ਇਲਾਜ ਦੇ
ਏਸ ਨਵੇਂ ਸਾਲ ਤੇ ਲਾਈਏ ਬੂਟੇ ਨਵੇਂ ਸਮਾਜ ਦੇ ,
ਮਿਲੇ ਸੁਖ ਸਹੁਲਤ ਚੰਗੀ ਹਰ ਇੱਕ ਦੁੱਖੀ ਬੇਚਾਰੇ ਨੂੰ
ਇਹ ਨਵਾਂ ਸਾਲ ਲੈ ਆਵੈ , ਪਿਆਰ ਤੇ ਭਾਈਚਾਰੇ ਨੂੰ ।
ਵਰਸੈ ਮੀਂਹ ਦੀ ਰਹਿਮਤ ਹਰ ਇੱਕ ਖੇਤ ਬਗੀਚੇ ਬਾੜੀ
ਚੰਗੀਆਂ ਹੋਵਣ ਫ਼ਸਲਾਂ ਸਭ ਦੀ ਚੰਗੀ ਸਾਉਣੀ ਹਾੜੀ ,
ਨਾਲੇ ਕਰ ਦੋ ਪਾਣੀ ਮਿੱਠਾ ਸਭ ਬੋਰਾਂ ਦੇ ਖਾਰੇ ਨੂੰ
ਇਹ ਨਵਾਂ ਸਾਲ ਲੈ ਆਵੈ , ਪਿਆਰ ਤੇ ਭਾਈਚਾਰੇ ਨੂੰ ।
ਇਸ ਨਵੇਂ ਸਾਲ ਵਿੱਚ ਕਰੇ ਨਾ ਖੁਦਕੁਸ਼ੀ ਕਿਸਾਨ ਕੋਈ
ਮਿਲ ਜਾਏ ਮੁਕਤੀ ਕਰਜੇ ਤੋਂ ਦੇਵੇ ਨਾ ਜਾਨ ਕੋਈ ,
ਉਹਦੇ ਚੜ੍ਹਨ ਦੇਈਂ ਨਾ ਰੱਬਾ ਸਿਰ ਤੇ ਕਰਜੇ ਭਾਰੇ ਨੂੰ
ਇਹ ਨਵਾਂ ਸਾਲ ਲੈ ਆਵੈ , ਪਿਆਰ ਤੇ ਭਾਈਚਾਰੇ ਨੂੰ ।
ਚੰਗੀ ਹੋਵੇ ਸਿੱਖਿਆ ਸਿਹਤ ਚੰਗੇ ਸੋਚ ਵਿਚਾਰ ਜੀ
ਨਾ ਭੁੱਲੇ ਕੋਈ ਵਿਰਸਾ ਆਪਣਾ ਸੱਭਿਆਚਾਰ ਜੀ ,
ਜੜ੍ਹਾਂ ਵੱਢਣ ਤੋਂ ਰੋਕੀ ਚੱਲ ਪਏ ਪੱਛਮੀ ਆਰੇ ਨੂੰ
ਇਹ ਨਵਾਂ ਸਾਲ ਲੈ ਆਵੈ , ਪਿਆਰ ਤੇ ਭਾਈਚਾਰੇ ਨੂੰ ।
ਏਥੇ ਭਾਈਚਾਰਾ ਕੌਮੀ ਏਕਤਾ ਬਣੀ ਰਹੇ ਸਭ ਦੀ
ਹਰ ਇੱਕ ਦੇ ਵਿੱਚ ਜਗਦੀ ਇੱਕੋ ਜੋਤੀ ਹੈ ਰੱਬ ਦੀ ,
ਸਭ ਇੱਕ ਅੱਖ ਨਾਲ ਤੱਕਣ ਮੰਦਰ ਗੁਰੂਦੁਆਰੇ ਨੂੰ
ਇਹ ਨਵਾਂ ਸਾਲ ਲੈ ਆਵੈ , ਪਿਆਰ ਤੇ ਭਾਈਚਾਰੇ ਨੂੰ ।
ਨਵੇਂ ਸਾਲ ਵਿੱਚ ਆਪਾਂ ਅੰਧ ਅਗਿਆਨ ਮਿਟਾਉਣਾ ਹੈ
ਹਿੰਦੂ ਮੋਮਨ ਸਿੱਖ ਇਸਾਈ ਇੱਕ ਦਾ ਪਾਠ ਪੜਾਉਣਾ ਹੈ ,
ਭਾਈ ਫੇਰ ਮਿਲਾਂਗੇ ਜਾਕੇ ਜਗ ਦੇ ਸਿਰਜਣਹਾਰੇ ਨੂੰ
ਇਹ ਨਵਾਂ ਸਾਲ ਲੈ ਆਵੈ , ਪਿਆਰ ਤੇ ਭਾਈਚਾਰੇ ਨੂੰ ।
ਦਾਤਾ ਏਸ ਸਾਲ ਵੀ ਬਖਸ਼ੀ ਖੁਲ੍ਹੇ ਸ਼ਬਦ ਭੰਡਾਰ ਜੀ
ਸ਼ਰਮਾ ਛੰਦ ਸੁਣਾਕੇ ਕਰਦੂ ਹਿਰਦੈ ਠੰਡੇ ਠਾਰ ਜੀ ,
ਪਰ ਨੱਥ ਰੱਖੀ ਤੂੰ ਪਾਕੇ ਏਸੇ ਬਲਦ ਹੰਕਾਰੇ ਨੂੰ
ਇਹ ਨਵਾਂ ਸਾਲ ਲੈ ਆਵੈ , ਪਿਆਰ ਤੇ ਭਾਈਚਾਰੇ ਨੂੰ