ਜਦ ਵਿਦਿਆ ਹੈ ਤੇਰੇ ਕੋਲ ਜਵਾਨਾ,
ਫਿਰ ਕਿਉਂ ਬੋਲੇਂ ਕੌੜੇ ਬੋਲ ਜਵਾਨਾ?
ਜੇ ਕੁਝ ਪਾਉਣਾ ਚਾਹੇਂ ਜੀਵਨ ਦੇ ਵਿੱਚ,
ਤੈਨੂੰ ਕਰਨਾ ਪੈਣਾ ਘੋਲ ਜਵਾਨਾ।
ਜਿਹੜੀ ਗੱਲ ਕਰਨੀ ਏਂ,ਬਹਿ ਕੇ ਕਹਿ ਤੂੰ,
ਚਾਰੇ ਪਾਸੇ ਵਜਾ ਨਾ ਢੋਲ ਜਵਾਨਾ।
ਜਦ ਮਾਂ-ਪਿਉ,ਭੈਣ-ਭਰਾ ਕੋਲ ਨੇ ਤੇਰੇ,
ਫਿਰ ਕੱਲਾ ਸਮਝ ਕੇ ਨਾ ਡੋਲ ਜਵਾਨਾ।
ਹਾਕਮ ਮਿੱਤਰ ਹੈ ਲੋਟੂ ਢਾਣੀ ਦਾ,
ਉਸ ਦੀ ਖੁਲ੍ਹ ਚੱਲੀ ਹੈ ਪੋਲ ਜਵਾਨਾ।
ਇਹ ਜੀਵਨ ਮੁੜ ਫਿਰ ਨਹੀਂ ਮਿਲਣਾ ਤੈਨੂੰ,
ਇਸ ਨੂੰ ਮਿੱਟੀ ਵਿੱਚ ਨਾ ਰੋਲ ਜਵਾਨਾ।
ਹਰ ਕੋਈ ਆਪਣਾ ਨਹੀਂ ਇਸ ਦੁਨੀਆਂ ਵਿੱਚ,
ਹਰ ਇਕ ਨਾ' ਦੁੱਖ-ਸੁੱਖ ਨਾ ਫੋਲ ਜਵਾਨਾ।