ਨਵੇਂ ਸਾਲ ਦਿਆ ਸੂਰਜਾ ਵੇ
(ਕਵਿਤਾ)
ਚੜ੍ਹ ਚੜ੍ਹ ਚੜ੍ਹ ਨਵੇਂ ਸਾਲ ਦਿਆ ਸੂਰਜਾ ਵੇ
ਚੜ੍ਹ ਚੜ੍ਹ ਚੜ੍ਹ ਨਵੇਂ ਸਾਲ ਦਿਆ ਸੂਰਜਾ ਵੇ
ਸੁੱਖ ਦਾ ਸੁਨੇਹਾ ਕੋਈ ਲਿਆ
ਦੂਰ ਕਰ ਨ੍ਹੇਰੇ ਲੱਭਨ ਵਿਆਂ ਸਵੇਰਿਆਂ ਨੂੰ
ਸਗਨਾਂ ਦੇ ਗੀਤ ਕੋਈ ਗਾ
ਨਫਰਤਾਂ ਦਾ ਬੀਜ ਜਿਹੜੇ ਬੀਜਦੇ ਨੇ ਰਾਹਾਂ ਵਿਚ
ਪਿਆਰ ਵਾਲੀ ਵੰਝਲੀ ਵਜਾ
ਭੁੱਲ ਜਾ ਅਤੀਤ ਦੀਆਂ ਯਾਦਾਂ ਲਹੂ ਪੀਣੀਆਂ ਨੂੰ
ਸੁਪਨੇ ਭਵਿੱਖ ਦੇ ਸਜਾ
ਚੜ੍ਹ ਚੜ੍ਹ ਚੜ੍ਹ ਨਵੇਂ .
ਬੇਈਮਾਨੀ ਠੱਗੀ ਠੋਰੀ ਲੁੱਟਾਂ ਖੋਹਾਂ ਹੋਣ ਏਥੇ
ਕੀਤਾ ਮਹਿੰਗਾਈ ਬੁਰਾ ਹਾਲ ਵੇ
ਚੋਰ ਹੈ ਉਚੱਕਾ ਗੁੰਡੀ ਰੰਨ ਪ੍ਰਧਾਨ ਏਥੇ
ਕਿਵੇ ਆਉ ਦੱਸ ਨਵਾਂ ਸਾਲ ਵੇ ?
ਭੁੱਖੇ ਢਿੱਡੀ ਰੋਟੀ ਅਤੇ ਮਿਹਨਤਾਂ ਦਾ ਪਾਈ ਮੁੱਲ
ਹੱਕ ਸੱਚ ਨਾਲ ਕਰੀ ਨਿਆਂ ।
ਚੜ੍ਹ ਚੜ੍ਹ ਚੜ੍ਹ ਨਵੇਂ
ਨਵੇਂ ਸਾਲ ਤੋਲੀ ਆ ਕੇ ਮੰਦਰਾਂ ਚ ਸੋਨਾ ਕਿੰਨਾ ਲੱਗਦੇ
ਕਰੋੜਾਂ ਦੇ ਕਿਉਂ ਬੁੱਤ ਵੇ ?
ਭੁੱਖ ਅਤੇ ਚਿੱਟੇ ਨਾਲ ਹਰ ਸਾਲ ਮਰ ਜਾਂਦੇ
ਦੱਸ ਕਾਹਤ ਮਾਵਾਂ ਦੇ ਹੀ ਪੁੱਤ ਵੇ ?
ਕਰਦੇ ਕਿਉ ਖੁਦਕਸੀ ਅੰਨਦਾਤੇ ਸਾਡੇ ਹੁਣ
ਬਾਹਰ ਦੱਸੀਂ ਧੰਨ ਕਿੰਨਾ ਪਿਆ ?
ਚੜ੍ਹ ਚੜ੍ਹ ਚੜ੍ਹ ਨਵੇਂ.
ਛੀਆਂ ਦੇ ਆਲ੍ਹਣੇ ਜੇ ਢਾਹ ਕੇ ਹੀ ਬਣਾਉਂਦਾ ਰਿਹਾ
ਆਪਣੇ ਹੀ ਘਰ ਇਹ ਮਨੁੱਖ ਵੇ
ਕਿਵੇਂ ਆਊ ਸਾਹ ਮੇਰੇ ਬੱਚਿਆਂ ਦੇ ਬੱਚਿਆਂ ਨੂੰ
ਕੱਟੇ ਗਏ ਏਦਾਂ ਹੀ ਜੇ ਰੁੱਖ ਵੇ
ਨਵੇਂ ਸਾਲ ਲਿਆ ਕੋਈ ਚਾਨਣੀ ਦੀ ਰੁੱਤ ਤੂੰ ਹੀ
ਬੁੱਕਲ “ ਚ ਸੂਰਜ ਛੁਪਾ ।
ਚੜ੍ਹ ਚੜ੍ਹ ਚੜ੍ਹ ਨਵੇ..
ਭੁੱਲ ਜਾ ਭਰੂਣ ਜਿਹੀ ਹੱਤਿਆ ਤੇ ਨਸਆਂ ਨੂੰ
ਛੇਵੇਂ ਦਰਿਆ ਨੂੰ ਠੱਲ੍ਹ ਪਾਈਂ ਵੇ
ਪੀਰਾਂ ਤੇ ਫਕੀਰਾਂ ਵਾਲੀ ਧਰਤੀ ਦੇ ਮਾਲਕਾ
ਨਿਤਾਣਿਆਂ ਨੂੰ ਗਲ ਨਾਲ ਲਾਈਂ ਵੇ
ਵਿਸਵ ਦੇ ਵਿਹੜੇ ਵਿਚ ਮਹਿਕਾਂ ਤੂੰ ਖਿਲਾਰ ਕੇ ਤੇ
ਆ ਜਾ ਭਾਗਾਂ ਵਾਲਿਆ ਤੂੰ ਆ।
ਚੜ੍ਹ ਚੜ੍ਹ ਚੜ੍ਹ ਨਵੇ.
ਲੋਕ ਰਾਜ ਵਾਲੀ ਹੋਵੇ ਸਦਾ ਜੈ ਜੈ ਕਾਰ ਏਥੇ
ਦੱਬੀ ਨਾ ਲੋਕਾਈ ਦੀ ਆਵਾਜ ਵੇ
ਰੱਬੀ ਮਿਹਰ ਰੱਖੀਂ ਸਦਾ ਰੱਬ ਦਿਆਂ ਬੰਦਿਆਂ ਤੇ
ਮੰਨੀ ਸਾਡੀ ਇਕ ਅਰਦਾਸ ਵੇ
ਸੋਨ ਤੇ ਸੁਨਹਿਰੀ ਤੇਰੀ ਕਿਰਨਾ ਨੂ ਜੀ ਆਇਆਂ
ਦਿੱਤਾ ਕਾਉਂਕੇ” ਤੇਲ ਹੈ ਚੁਆ।
ਚੜ੍ਹ ਚੜ੍ਹ ਚੜ੍ਹ ਨਵੇਂ ਸਾਲ ਦਿਆ ਸੂਰਜਾ ਵੇ
ਸੁੱਖ ਦਾ ਸੁਨੇਹਾ ਕੋਈ ਲਿਆ ।