ਜਜ਼ਬਾ (ਕਵਿਤਾ)

ਨਿਰਮਲ ਸਿੰਘ ਢੁੱਡੀਕੇ   

Address:
Ontario Canada
ਨਿਰਮਲ ਸਿੰਘ ਢੁੱਡੀਕੇ ਦੀਆਂ ਹੋਰ ਰਚਨਾਵਾਂ ਪੜ੍ਹਨ ਲਈ ਇਥੇ ਕਲਿਕ ਕਰੋ

ਜਜ਼ਬਾ-ਏ ਪੰਜਾਬ ਦਾ, ਦਿਸਦਾ ਕਿਤੇ ਕਿਤੇ।
ਖਿੜਿਆ ਫੁੱਲ ਗੁਲਾਬ ਦਾ,ਮਿਲਦਾ ਕਿਤੇ ਕਿਤੇ l

ਖਿੜੇ ਗੁਲਜ਼ਾਰ ਦੀ, ਮਹਿਕ ਆਉਣੀ ਬੰਦ ਕਿਓਂ,
ਬੁੱਲਾ ਕੋਈ ਬਹਾਰ ਦਾ, ਠਿੱਲ੍ਹਦਾ ਕਿਤੇ ਕਿਤੇ l

ਜਿੱਥੇ ਪੌਣ ਪਾਣੀ ਨੂੰ, ਨਹੀਂ ਸਤਿਕਾਰਿਆ,
ਖੂਹਾ ਮਿੱਠੇ ਆਬ ਦਾ, ਗਿੜਦਾ ਕਿਤੇ ਕਿਤੇ l

ਰੌਲਾ ਰੱਪਾ ਪੈ ਗਿਆ, ਕੰਮਾਂ ਕਾਰਾਂ ਦਾ,
ਮਿੱਠਾ ਰਾਗ ਰਬਾਬ ਦਾ, ਛਿੜਦਾ ਕਿਤੇ ਕਿਤੇ l

ਹੈ ਵਿਕਦਾ ਨਕਲੀ ਮਾਲ, ਕਈ ਦੁਕਾਨਾਂ ਦਾ,
ਸੌਦਾ ਮਿਰੇ ਹਿਸਾਬ ਦਾ, ਮਿਲਦਾ ਕਿਤੇ ਕਿਤੇ l

ਪਾਕ ਪਵਿੱਤਰ ਰੂਹਾਂ ਨੂੰ, ਯਾਦ ਕਰੀਏ ਤਾਂ ,
ਰੱਬ ਵਰਗਾ ਜੋ ਜਾਪਦਾ, ਦਿਸਦਾ ਕਿਤੇ ਕਿਤੇ l

ਛਡ ਕੇ ਅਪਣੇ ਪਿੰਡਾਂ ਨੂੰ, ਕਈ ਪ੍ਰਦੇਸੀ ਹੋ ਗਏ ,
ਛੁੱਟ ਗਿਆ ਘਰ ਬਾਰ ਦਾ, ਰਿਸ਼ਤਾ ਕਿਤੇ ਕਿਤੇ l

ਮੋਇਆਂ ਨੂੰ ਹਰ ਵੇਲੇ, ਕਿਓਂ ਦੋਸ਼ੀ ਕਹਿਣਾ, 
ਫਰਜ਼ ਨਿਭਾਉਂਦਾ ਯੋਧਾ, ਦਿਸਦਾ ਕਿਤੇ ਕਿਤੇ l

ਉੱਤਰ ਗਿਆ ਸ਼ਰਾਬ ਵਿੱਚ, ਰੰਗ ਜਵਾਨੀ ਦਾ,
ਹਾਸਾ ਅੱਲ੍ਹੜ ਵਰੇਸ ਦਾ, ਖਿੜਦਾ ਕਿਤੇ ਕਿਤੇ l

ਦਾਤ ਨਾਲ ਸਾਗ, ਚੀਰਦੀ, ਵੱਡੀ ਬੇਬੇ ਸੀ,
ਹੁਣ ਚੁੱਲ੍ਹੇ ਧਰਿਆ ਸਾਗ, ਰਿਝਦਾ ਕਿਤੇ ਕਿਤੇ l

ਸੁਣਦੀ ਨ ਘੁਮਕਾਰ ਅੱਜ, ਕਿਤੇ ਮਧਾਣੀ ਦੀ, 
ਚਰਖ਼ਾ ਚਲਦਾ ਨਾਰ ਦਾ, ਦਿਸਦਾ ਕਿਤੇ ਕਿਤੇ l

ਪੰਡ ਚੁੱਕ ਲਈ, ਸ਼ੁਹਰਤ ਵਾਲ਼ੇ ਗੁਮਾਨ ਦੀ,
ਜਾਵਾਂ ਡੀਂਘਾਂ ਮਾਰਦਾ, ਲਿਫ਼ਦਾ ਕਿਤੇ ਕਿਤੇ l

ਟੈਲੀਫੋਨਾਂ 'ਤੇ ਨਵੀਂ ਹੀ, ਬਿਮਾਰੀ ਚੱਲੀ ਹੈ,
ਰੋਗ ਵਿਗੜੇ ਹਲਾਤ ਦਾ, ਮਿਟਦਾ, ਕਿਤੇ ਕਿਤੇ l

ਚੇਤੇ ਆਉਂਦੇ ਅਕਸਰ, ਸਾਥੀ ਬਚਪਨ ਦੇ,
“ਨਿਰਮਲ” ਖ਼ਿਆਲ ਆਪਦਾ, ਲਿਖਦਾ ਕਿਤੇ ਕਿਤੇ l