ੳ ਅ ਜ਼ਿੰਦਗੀ ਵਾਲਾ ਸਿੱਖਾ ਤਾ ਘੋਲ਼ਾਂ ਨੇ ।
ਬੱਚਾ ਬੁੱਢਾ ਸਭ ਨੂੰ ਪੜ੍ਹਨੇ ਪਾ ਤਾ ਘੋਲ਼ਾਂ ਨੇ ।
ਜਾਤ ਪਾਤ ਤੇ ਧਰਮ ਦੀਆਂ ਜੋ ਵੰਡੀਆਂ ਪਾਉਂਦੇ ਸੀ ।
ਵੋਟਾਂ ਦੇ ਲਈ ਇੱਕ ਦੂਜੇ ਦੇ ਨਾਲ ਲੜਾਉਂਦੇ ਸੀ ।
ਕੌਣ ਨੇ ਸਾਡੇ ਸਾਂਝੇ ਦੁਸ਼ਮਣ ਇਹ ਸਮਝਾ ਤਾ ਘੋਲ਼ਾਂ ਨੇ ।
ੳ ਅ …..
ਸੱਥਾਂ ਦੇ ਵਿੱਚ ਗੱਲਾਂ ਚੱਲੀਆਂ ਕਿਰਤ ਬਚਾਉਣ ਦੀਆਂ ।
ਬੇਬੇ ਕਰੇ ਤਿਆਰੀ ਘੋਲ ਚ੍ਹ ਚਾਲ੍ਹੇ ਪਾਉਂਣ ਦੀਆਂ ।
ਚੇਤਨਤਾ ਦਾ ਐਸਾ ਜਾਗ ਲਗਾ ਤਾ ਘੋਲ਼ਾਂ ਨੇ ।
ੳ ਅ …..
ਭਾਊ ਤਾਊ ਜੱਫੀਆਂ ਪਾ ਕੇ ਨਾਹਰੇ ਮਾਰ ਰਹੇ ।
ਭਾਈਚਾਰਿਕ ਸਾਂਝ ਦੇ ਵੇਖੋ ਉੱਸਰ ਮੀਨਾਰ ਰਹੇ ।
ਸਾਂਝੀਵਾਲਤਾ ਵਾਲਾ ਜਾਮ ਪਿਆ ਤਾ ਘੋਲ਼ਾਂ ਨੇ ।
ੳ ਅ .….
ਪੂਰਬ ਪੱਛਮ ਉੱਤਰ ਦੱਖਣ ਕੱਠੇ ਹੋਏ ਨੇ ।
ਮਣਕੇ ਕਿਰਤੀ ਤੇ ਕਿਰਸਾਨੀ ਏਕੇ ਵਿੱਚ ਪਰੋਏ ਨੇ ।
ਹੱਕ ਲੈਣ ਦਾ ਸਿੱਧਾ ਰਾਹ ਦਿੱਖਲਾ ਤਾ ਘੋਲਾਂ ਨੇ ।
ੳ ਅ…..
ਮਾਂ ਭਾਗੋ ਦੀ ਬੇਟੀ ਘੱਤ ਵਹੀਰਾਂ ਆ ਗਈ ਐ ।
ਜੰਗ ਮੈਦਾਨੇ ਅੰਦਰ ਨਵੀਆਂ ਲੀਹਾਂ ਪਾ ਗਈ ਐ ।
ਜੋਸ਼ ਜਵਾਨੀ ਅੰਦਰ ਫੇਰ ਜਗਾ ਤਾ ਘੋਲ਼ਾਂ ਨੇ ।
ੳ ਅ….
ਨਵੇਂ ਤਰੀਕੇ ਦੇ ਨਾਲ ਸੋਚਣ ਲਾ ਤਾ ਲੋਕਾਂ ਨੂੰ ।
ਹੱਕ ਸੱਚ ਲਈ ਲੜ੍ਹਨ ਦਾ ਰਾਹ ਵਿਖਾ ਤਾ ਲੋਕਾਂ ਨੂੰ ।
ਬਲਜੀਤ ਭਲੂਰੀਏ ਨੂੰ ਵੀ ਨਸ਼ਾ ਝੜਾ ਤਾ ਘੋਲ਼ਾਂ ਨੇ ।
ੳ ਅ….