ਇਹ ਵੇਖੋ ਕੈਸਾ ਰਾਜ ਹੈ ਮੀਆਂ।
ਬਦਮਾਸ਼ਾਂ ਦੇ ਸਿਰ ਤਾਜ ਹੈ ਮੀਆਂ।
ਰਾਗਾਂ ਦੀ ਜਿਹੜਾ ਸਾਰ ਨਾ ਜਾਣੇ,
ਹੁਣ ਉਸ ਦੇ ਹੱਥ ਚ ਸਾਜ ਹੈ ਮੀਆਂ।
ਹੈ ਰੰਗ ਲਗਾ ਅੱਜ ਸ਼ਕਲ ਬਦਲ ਕੇ,
ਇਕ ਚਿੱੜੀ ਬਣਗੀ ਬਾਜ ਹੈ ਮੀਆਂ।
ਸੱਚੇ ਨੂੰ ਫੜ ਵਿੱਚ ਜੇਲ ਪਾ ਦਿੱਤਾ,
ਝੂਠੇ ਦੀ ਉੱਚੀ ਅਵਾਜ਼ ਹੈ ਮੀਆਂ।
ਤਾਕਤ ਸ਼ੈਤਾਨਾਂ ਹੱਥ ਜਦ ਆਈ,
ਰਾਹਾਂ ਵਿਚ ਰੁਲਦੀ ਲਾਜ ਹੈ ਮੀਆਂ।
ਨਾਂ ਤੇਰਾ ਲੈ ਕੇ ਲੁੱਟਦੇ ਸਾਰੇ,
ਪੜਦੇ ਬਾਣੀ ਜਾਂ ਨਮਾਜ ਹੈ ਮੀਆਂ।
ਖੁਦ ਹੀ ਕਰਕੇ ਦੂਸ਼ਤ ਹਵਾ ਪਾਣੀ,
ਫਿਰ ਵੀ ਕਰਦੇ ਨੇ ਨਾਜ ਹੈ ਮੀਆਂ।
ਹੱਕਾਂ ਦੀ ਖਾਤਰ ਵਾਰਨਾ ਆਪਾ,
ਇਹ ਹੀ ਅਸਲੀ ਪਰਵਾਜ ਹੈ ਮੀਆਂ।
ਇਹ ਫੁੱਲ ਕਲੀਆਂ ਤੇ ਹਵਾ ਪਾਣੀ,
ਅੱਲ੍ਹਾ ਨੇ ਦਿੱਤਾ ਦਾਜ ਹੈ ਮੀਆਂ।
ਹੈ ਮਨ ਵਿਚ ਸਿੱਧੂ ਧਾਰ ਕੇ ਤੁਰਿਆ,
ਭੈੜੇ ਦਾ ਖੋਲਣਾ ਪਾਜ ਹੈ ਮੀਆਂ।